Նորություններ / Հայաստանի ապահովագրողների միության պատասխանն Առողջապահության նախարարությանը

Ապահովագրական ընկերությունների և բուժհաստատությունների ֆինանսական ծախսերի, փոխհաշվարկների վերաբերյալ քննարկումներն իրականացվել են դեռ ամիսներ առաջ։

Ըստ օրենսդրական ներկա կարգավորումների՝ ընկերությունները վճարումներն իրականացնում են Բյուրոյի կողմից սահմանված կանոններին համապատասխան և ոչ պատշաճ է խոսել կուտակված «մեծաթիվ» պարտքերի մասին։

Ուստի Առողջապահության նախարարության կողմից նման ձևաչափով և կոշտ խոսույթով հանդիպում նախաձեռնելն անհարկի է և ուղղված է ընկերությունների գործարար համբավի արատավորմանը։

Նշենք, որ ՀՀ առողջապահության նախարարությունն օրերս հանդիպում էր կազմակերպել «տրամադրված բուժծառայության դիմաց ապահովագրական ընկերություններն ինչու՞ չեն փոխհատուցում բժշկական հաստատություններին, ինչպե՞ս են կուտակվել մեծաթիվ պարտքեր» հարցի շուրջ։

Հայաստանի ապահովագրողների միությունը պատրաստակամ է մասնակցել տարբեր ձևաչափերով, հավուր պատշաճի և պաշտոնական հանդիպումների պահանջներին հարիր ցանկացած կառուցողական քննարկման՝ առկա կամ հնարավոր հարցերի, խնդիրների բարձրաձայնման և լուծման նպատակով։