Նորություններ / Հայաստանի ապահովագրողների միությունը՝ հեղինակավոր միջազգային կոնֆերանսում

Հայաստանի ապահովագրողների միությունը՝ հեղինակավոր միջազգային կոնֆերանսում

Մոնակոյում՝ Մոնտե Կառլոյում, սեպտեմբերի 7-11-ն անցկացվեց ամենամյա Rendez-Vous de Septembre 66-րդ կոնֆերանսը, որին մասնակցում էր Հայաստանի ապահովագրողների միությունը։

Rendez-Vous de Septembre-ն համարվում է ապահովագրական աշխարհի խոշորագույն միջոցառումը։

1957թ. սկսած այն մեկտեղում է ապահովագրողներին, վերաապահովագրողներին, ինչպես նաև բրոքերներին ու ռիսկերի կառավարիչներին փորձի փոխանակման, փոխշահավետ քննարկումների և կապերի հաստատման համար։ Ամեն տարի հեղինակավոր միջոցառմանը մասնակցում են նաև իրավաբաններ, ֆինանսական խորհրդատուներ, ոլորտը լուսաբանող լրագրողներ։

Որպես ամենամեծ մասնագիտական համաժողով՝ այն մասնակիցներին հնարավորություն է տալիս քննարկել առկա հիմնական խնդիրները, մարտահրավերները, շուկայի փոփոխություններն ու հեռանկարները:

Տարեցտարի համաժողովն ավելի մեծ ընդգրկում է ստանում։ Եթե տարիներ առաջ Մոնտե Կառլոյում հավաքվում էին շուրջ 500 մասնագետներ 27 երկրներից, ապա այսօր արդեն կոնֆերանսն ունի մոտ 3000 մասնակից աշխարհի ավելի քան 8 տասնյակ երկրներից։

Ներկայացվածությամբ առաջատարն են Մեծ Բրիտանիան, Ֆրանսիան, ԱՄՆ-ը, Շվեյցարիան և Գերմանիան։

Rendez-Vous de Septembre-ի շրջանակում Մոնտե Կառլոյի սրտում՝ Bay Lagoon-ում անցկացվեց նաև Մոնակոյի արքայազն Ալբեր Երկրորդի կողմից հրավիրված հանդիսավոր ընդունելություն-ընթրիք, որին ևս մասնակցում էր Հայաստանի ապահովագրողների միությունը։

Համաժողովի շրջանակներում միությունը կարևոր հանդիպումներ ունեցավ, այդ թվում՝ աշխարհի խոշորագույն վերաապահովագրողներից մեկի՝ SCOR -ի հետ։ Հանդիպումը չափազանց արդյունավետ էր։ Քննարկվել են ոլորտին առնչվող կարևոր հարցեր, մտքեր փոխանակվել համագործակցության տարբեր ծրագրերի վերաբերյալ։

Ի դեպ, իսկ ինչու՞ է համաժողովն անցկացվում հենց Մոնակոյում։

Դրա համար մի քանի պատճառ կա։

  • Նախ Մոնտե Կառլոն, այսպես ասած, չեզոք վայր է, որը մինչև վերջերս չի ունեցել որևէ ապահովագրական ընկերություն:
  • Երկրորդ պատճառն այն է, որ Մոնակոյի Իշխանապետությունում շատ են բարձրակարգ հյուրանոցները, ընդ որում, տարածքը փոքր է, ինչը հեշտացնում է տեղաշարժը համաժողովի օրերին։
  • Վերջապես, Մոնակոն, անկասկած, մոլորակի ամենաապահով վայրերից մեկն է:

Վերջին նորությունները