Նորություններ / Հայաստանի ապահովագրողների միությունը՝ FINTECH360 -ի մասնակից

Հայաստանի ապահովագրողների միությունը՝ FINTECH360 -ի մասնակից

Հայաստանի ապահովագրողների միությունն ու ապահովագրական ընկերություններն այս տարի մասնակցեցին Երևանում անցկացվող FINTECH360 միջազգային համաժողովին։
Արդեն 10-րդ անգամ անցկացվող համաժողովը մեկտեղել էր ավելի քան 200 մասնակիցների, այդ թվում՝ բանկային, վճարային, ապահովագրական ոլորտների առաջատար փորձագետների, ՏՏ ընկերությունների թոփ մենեջերների, ֆինտեխ ստարտափների՝ քննարկելու թվային փոխակերպման և բիզնեսում նորարարությունների ներդրման լավագույն փորձը։
 
Քննարկման հիմնական թեմաներն էին՝ արհեստական բանականություն (AI), կրիպտոարժույթներ, բլոկչեյն, ապակենտրոնացված ֆինանսներ (DeFi), ծառայությունների հիպերանձնավորում, միջազգային դրամական փոխանցումների շուկայի հետագա զարգացում, ինչպես նաև ֆինտեխ լուծումներ բրոքերային և ապահովագրական ծառայություններում:
 
Համաժողովի շրջանակներում անցկացվեց «Թվային դարաշրջանն ապահովագրության մեջ. մարտահրավերներ և հնարավորություններ» թեմայով պանելային քննարկում, որին մասնակցում էին Ռեգո Ինշուրանս, Ինգո Արմենիա, Լիգա Ինշուրանս ընկերությունների տնօրենները։
 
ՀԱՄ-ն առանձնացրել է քննարկման ընթացքում հնչած մի քանի մտքեր․
  • Ներկայում ՀՀ ապահովագրական համակարգում թվայնացումը հիմնականում ընթանում է բջջային հավելվածների ներդրմամբ և օնլայն վաճառքի խթանմամբ։
  • Օնլայն վաճառքն ակտուալ է այն ապահովագրական պրոդուկտների համար, որոնց գնագոյացման գործընթացն ավելի պարզ է կամ հստակ կարգավորված, օրինակ՝ ԱՊՊԱ, ճամփորդական ապահովագրություն և այլն։
  • Ոլորտի թվայնացմանը խոչընդոտող մարտահրավերներ են հարակից ոլորտներում ավտոմատացման, թվային լուծումների բացակայությունը։
  • Խնդիր է նաև տարբեր ոլորտներում վիճակագրական շարքերի բացակայությունը, որի պատճառով նաև արդյունավետ չէ արհեստական բանականության կամ մեքենայական ուսուցման տեխնոլոգիաների կիրառումը։
  • Աշխարհում տեղի ունեցող գլոբալ տեխնոլոգիական փոփոխություններն իրենց ազդեցությունն են ունենալու ՀՀ ապահովագրական համակարգի վրա՝ հանգեցնելով նոր թվային լուծումների ներդրմանը։ Այդ լուծումները թույլ կտան ունենալ ավելի հաճախորդակենտրոն և ժամանակակից սպասարկում։
  • Արհեստական բանականությունը և մեքենայական ուսուցումը կկիրառվեն ապահովագրական պրոդուկտների գնագոյացման գործընթացներում։

Վերջին նորությունները